Жанчына з паэтычнаю душой
Надзея птушкай узляціць у высі.
Падорыць прагу шчырую тварыць.
Мой лёс, прашу, ты шчыра памаліся
За прагу вечную жыццё любіць.
Т. Яцук
Гісторыю ствараюць людзі - так важна стаяць на такой выснове, азіраючыся ў мінулае і гледзячы ў будучае такога руху як прфсаюзны, а нашаму - ужо вось-вось 100 гадоў. Але сення - пра нашых сучаснікаў, пра тых, хто зараз, у цяперашнім часе, побач з людзьмі, з іх праблемамі, і ў горы, як кажуць, і ў радасці.
Знаёмцеся, Таццяна Яцук — старшыня пярвічнай прафсаюзнай арганізацыі дзяржаўнай установы адукацыі "Сярэдняя школа № 4 г.Баранавічы". 25 гадоў Таццяна Мікалаеўна з'яўляецца лідарам дадзенай арганізацыі. Акрамя таго, паважаная настаўніца, выкладае ў роднай школе беларускую мову і літаратуру. Яе вучні з года ў год з'яўляюцца пераможцамі прадметнай алімпіяды па беларускай мове ў Брэсцкай вобласці і ў рэспубліцы. Але ж мы ведаем, таленавіты чалавек - таленавіты ва ўсім: Таццяна - лірычная паэтка, творчая жанчына з акрыленай рамантычнай душой. Праз паэзію яна шчыра выказвае сябе, цэлую гаму эмоцый і ўласны ўнутраны досвед. Паэтыка лірызму з яе душэўнай прачуласцю і меладыйнасцю слова — вызначальная рыса індывідуальнай манеры Таццяны Яцук. Нездарма шэраг яе вершаваных тэкстаў набыў адметнае музычна-песеннае ўвасабленне.
Яе «літаратурны інстытут» — філфак БДУ. Яна, былая «ўзлётаўка» (паводле назвы ўніверсітэцкага літаб’яднання «Узлёт»), вылецела, можна сказаць, з-пад крыла паэта і прафесара Алега Антонавіча Лойкі.
Шлях да першай паэтычнай кніжкі, аднак, задоўжыўся. Урэшце ў 2017 годзе пабачыў свет доўгачаканы паэтычны зборнік «Груша над абрывам». За першай кнігай выйшлі наступныя: «Маладосць на выданні», «Валошкавыя сны» (абедзве ў 2018 г.), «Паэма блукання і веры», «Бліскавіцы над Свіцяззю» (абедзве ў 2019 г.), «Алфавітная музыка слоў» (2020), “За сіняй птушкай” (2020). На словы Таццяны Яцук напісаны 17 песень, запісаны дыск. Таццяна Яцук — стваральніца лірыкі жаночай, паэзіі жаночага сэрца. Вось чаму ў кнігах прыкметнае месца займае ўвасабленне матываў кахання і любові, замілавання роднай прыродай.
Таццяна Яцук - Сябар Саюза беларускіх пісьменнікаў, Міжнараднай асацыяцыі пісьменнікаў і публіцыстаў.
Яна з’яўляецца кіраўніком літаратурнага аб’яднання «Купальскія зоры», якое дзейнічае пры баранавіцкай цэнтральнай бібліятэцы імя В.Таўлая. Вершы і песні Таццяны Мікалаеўны неаднаразова гучалі на міжнародным радыё ў аўтарскай праграме Зоі Кулік “Вас вітае Беларусь”. Літаратурнае аб’яднанне, якім кіруе Таццяна Яцук, часты госць ў навучальных установах горада (школах, каледжах, універсітэце), на пляцоўках гарадоў і вёсак Беларусі, дарылі “Купальскія зоры” сваю творчасць і на Дні беларускага пісьменства ў Слоніме, і на хрысціянскім фестывалі ў Баранавічах, і ў Пінску на Дні паэзіі "Зоры над Пінай", і на іншых значных і патрэбных мерапрыемствах , якія праводзіліся ў нашай краіне.
Галоўны герой яе вершаў змагаецца за дабрыню – пачуццё, якое не толькі ўзвялічвае чалавека і робіць яго чалавекам. Дабрыня ў паэткі выражае клопат сучаснага чалавека, адносіны да людзей, да сваёй зямлі, да сяброў і сваякоў, да гістарычных мясцін Бацькаўшчыны. Лірычны герой яе твораў – даволі ўражлівы чалавек, характар у яго прамы, просты, адкрыты і шчыры. Такі, як і сама аўтарка.
На сёння Таццяна Яцук у добрай творчай форме, яна поўная жыццёвых сіл, надзей, задум, планаў. Энергіі, запалу, натхнення, здаецца, ёй не пазычаць. Яна ўжо яскрава выявіла свой лірычны патэнцыял, у цэлым паўнавартасна рэалізавалася ў паэтычнай творчасці. Аднак яшчэ не вечар, і паэтка працягвае актыўную і плённую літаратурную працу.
З такім чалавекам, як Таццяна Мікалаеўна, добра людзям. Адкрытасць яе думак і дзейнасці, спагадлівасць, клопат аб сваіх калегах ствараюць у калектыве атмасферу даверу, сапраўднага партнёрства і ўзаемадапамогі. Філасофія яе дзейнасці - у радках яе вершаў:
Жыццё ідзе сваім зямным парадкам,
І мы стараемся трапляць у крок.
Растрачваем імгненні даастатку
І вечна ладзім паказальны ўрок.
Няхай ідуць гады, але , каб было так, што і яшчэ праз 100 гадоў у радах нашага прафсаюзнага руху былі такія лідары, як Таццяна Яцук - таленавітыя, прафесійныя, чалавечныя.
раскрыть » / « свернуть